Þessar mynir eru teknar í kringum 1980 og sýnir útskipun á freðfiski eins og það gekk fyrir sig áður en farið var að geyma fiskinn inni í geymslu á brettum og keyra þeim að skipshlið eða upp í flutningabíla sem seinna varð. Ég læt ykkur um að finna nöfn á þessa einstaklinga sem þarna koma við sögu.

Skelli þessari inn í tilefni strandveiðanna í ár.Smá getraun: Hvar er þessi mynd tekin og verðlaunin eru ekki af verri endanum. Fiskveiðitúr með Vininum út á fjörð.

Hér gefur að líta mynd sem tekin er af Heimi SU í kringum 1970 í Norðursjónum og er ljósmyndarinn.Ragnar pálson Frá Grindavík. Þetta voru miklar útiverur og voru kallarnir mest allt sumarið að heiman til að fanga silfrið og koma því í kassa sem síðan var landað í Danmark.

Þessi er tekin fyrir nokkrum dögum í góða veðrinu.Þekkið þið alla tindana?

Í tilefni sumarkomunnar hendi ég þessari inn, mynd sem er tekin fyrir allmörgum árum á 17 júní og sýnir hefðbundna skrúðgöngu sem farin var á þessum degi. Ég læt ykkur,lesendur góðir um að finna út hverjir þarna eru á ferð.

Þessi mynd er tekin uppi í Oddsskarði fyrir nokkrum dögum. Tekin á tíma en ég hafði engan fót svo hún er örlítið óskýr en ég læt hana flakka samt.

Þetta er án efa mynd ársins en hún er stolin af Vísir.is og hefur greinilega lent í höndunum á einhverjum photoshopara og er skemmtilega unnin. Ég safnaði nokkrum inn í albúm svona upp á seinni tímann.

Þessa mynd tók Kjartan Herbjörnsson seint á níunda áratug seinustu aldar og sýnir síldarsöltun í fullum gangi í salthúsinu á Stöðvarfirði. Þarna er hratt unnið því varla hefst undan,bátur á leið í land fleyifullur af hafsins silfri sem er óðara breytt í gull þegar heim er komið. Fleiri myndir í albúmi.

Þessi mynd sem er úr albúmi mömmu minnar er orðin nokkuð gömul, en þarna er gamla kaupfélagið í fullri drift og Björn á Hóli hefur greinilega ýtt sínu fleyi úr vör og róið á fengsæl fiskimið því Ópelinn hans gamli stendur þarna og bíður eiganda síns.Hef ekki fleiri orð um þessa mynd sem talar sínu máli sjálf...

Þessi mynd er tekin 1988 held ég og sýnir Bankann svokallaða að hruni kominn eftir að það kviknaði í út frá ofni sem var þar inni í gangi og þar með var sögu þessa merka húss lokið. Brekkan er þarna á sínum stað en undir öðru nafni en það eru mörg skiltin búin að hanga þarna á veggnum með jafnmörgum nöfnum.Fjárhúsin í Bakkagerði eru þarna á hraðri niðurleið og Sigurjón Geirsson er greinilega byrjaður á að stinga upp kartöflugarðinn. Það er oft gaman að líta til baka

Þarna gefur að líta mynd sem ég tók 15.11.93  er við vorum nýkomnir á Kambaröstinni í Smuguna en fréttir höfðu borist um mikla veiði þarna við ísröndina. Það eina sem við höfðum út úr þessum túr voru 15 tonn í lest og upplifunin við að sjá þessa ísbirni sem sjást þarna á myndinni og voru sjálfsagt í svipuðum erindagjörðum og við.