Jólin eru tími friðar og hamingju. Verum góð hvort við annað.

Þetta mun vera Þóra Jónsdóttir eða Þóra í Vinaminni eins og Stöðfirðingar kölluðu hana. Var hún hluti af harðfiskgenginu á Stöddanum sem lagði metnað sinn í að framleiða þann gæðafisk sem harðfiskdeild HSS gat státað af. Fleiri myndir eru í albúmi og fleiri eiga eftir að líta dagsins ljós því skönnun er ekki lokið. Sólrún systir tók þessar myndir að ég best veit.

Þessi er tekin 1964 og sýnir heimreiðina í augum þeirra túrista sem lögðu það á sig að ferðast um landið á þessum tíma. Ég hef verið að skanna inn og laga myndir sem teknar eru á þessu tímabili og munu þær birtast hér í albúmi þegar það verk er í höfn.

Hér skríður Gísli Súrsson inn fjörðinn með slatta af verðmætum í maganum. Á bryggjunni bíður flutningabíll sem kemur aflanum hratt og örugglega í burtu............

Tók þessa af gráa gullinu fyrir nokkrum dögum er skipið var á leið til síldveiða.

Þessi farkostur lá við bryggju á Akureyri þegar ég átti þar leið um fyrir all stuttu síðan. Fólk streymdi frá borði til að kíkja aðeins í bæinn og kaupa sér eitthvað til minningar um dvölina í þessum fallega bæ.Eldri maður stoppaði við hlið mér er ég var að smella af þessari  mynd og talaði um að það hefðu nú trúlega verið ófá handtökin við smíði þessarar skútu eins og hann orðaði það og vorum við sammála um það er við stóðum og mældum út farkostinn.Við litum ekki einu sinni við til að horfa á stóra skipið sem Samherji var nýbúinn að flagga inn á nýjan leik og ber nú nafnið Kristína....

Þeir sem komnir eru eitthvað til ára sinna ættu að kannast við þessa heimsmynd sem hér blasir við, enda var þetta umhverfi draumaveröld okkar sem áttum því láni að fagna að alast upp í þessu sjávarplássi.Þessi mynd er tekin fyrir neðan Skuld, sem þá var bara ein hæð og hræddur er ég um það ef ég tæki mynd frá þessum sama stað í dag,sæist í nýlegt graffík verkstæði á milli trjáa í frumskóginum sem þrifist hefur þarna síðustu ár.
 Ég læt ykkur um að eyrnamerkja kofana og smá getraun: Hvaða hús vantar á myndina? 

Þessa mynd rakst ég á um daginn er ég var að skoða mig um á nytjamarkaði á Hvammstanga og er hún utan á árbók S V Í. Þarna siglir Heimir SU inn til Vestmannaeyja,trúlega undir nafninu,Hákon þegar þessi mynd er tekin. Hinn bátinn þekki ég ekki en allar ábendingar eru vel þegnar.Enginn ljósmyndari er skráður fyrir þessari mynd.

Þessi mynd er tekin fyrir nokkrum dögum er við feðgar sjósettum fjölskyldubátinn í góðu veðri og var tekinn rúntur um fjörðinn í góða veðrinu. Teknar margar myndir eins og þessi sem sýnir Arnar við vélgæslu aftur í skut.

Ekki hefur farið mikið fyrir aflabrögðum hjá trillumönnum sem róa frá Stöðvarfirði þetta sumarið en þeir halda í vonina enda Björn Magnússon og sonur hans komnir með Vonina sína alla leið frá Vopnafirði þar sem þeir hafa lagt upp undanfarið.